10:44 PM
Anonymous
ថ្ងៃព្រហស្បតិ៍ ទី៣០ ខែមិថុនា ឆ្នាំ២០១៦ ម៉ោង ០៧:៤៥ (30-06-2016 07:45)
រាជធានីភ្នំពេញ ៖ សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានប្រកាសជាសាធារណៈ ដកតំណែង និងឋានន្តរស័ក្តិ ឧត្តមសេនីយ៍មួយរូប ព្រមទាំងបណ្ដេញចេញពីនគរបាល ដើម្បីព្រមានដល់អ្នកមានអំណាចទាំងអស់ឲ្យចេះគោរពច្បាប់ ចេះប្រើពាក្យសំដី មានសុជីវធម៌ មានគុណធម៌ និងសីលធម៌ ។
សម្តេចតេជោ ហ៊ុន សែន បានសរសេរបង្ហោះនៅក្នុងហ្វេសប៊ុកផ្លូវការរបស់សម្តេចកាលពីវេលាម៉ោង១ និង២៨នាទីរំលងអធ្រាត្រឈានចូលថ្ងៃទី៣០ ខែមិថុនា ឆ្នាំ២០១៦ ថា ៖ «ខ្ញុំបានស្រាវជ្រាវយ៉ាងយកចិត្តទុកដាក់ និងស្តាប់សារចុះសារឡើងនូវការនិយាយរបស់ លោកឧត្តមសេនីយ៍ ។ ពាក្យ(អាប៉ូលីសចរាចរណ៍)ជាពាក្យមិនត្រឹមតែប្រមាថមើលងាយថ្នាក់ក្រោមប៉ុណ្ណោះទេ តែជាការប្រមាថដល់ស្ថាប័ននគរបាលចរាចរណ៍ទាំងមូល» ។
សម្តេចតេជោ ហ៊ុន សែន បានសរសេរទៀតថា «ខ្ញុំមិននឹកស្មានដល់សោះថា គាត់ជាប៉ូលីសបែរជាប្រើពាក្យ «អាប៉ូលីស» ចុះទំរាំប្រជាជនធម្មតា គាត់ហៅយ៉ាងម៉េចទៀតនៅពេលគាត់ខឹង? ។ ខ្ញុំអត់មានជម្រើសឱ្យល្អក្រៅពីសំរេចចិត្តទាំងការឈឺចាប់ និងសោកស្តាយ ដើម្បីដកតំណែង និង ឋានន្តរស័ក្តិ ព្រមទាំងបណ្តេញគាត់ចេញពីនគរបាលប៉ុណ្ណោះ ។ នេះជាគំរូសំរាប់អ្នកមានអំណាចទាំងអស់ឱ្យចេះគោរពច្បាប់ ចេះប្រើពាក្យសំដីមានសុជីវធម៌ មានគុណធម៌ និងសីលធម៌» ។
ជាចុងក្រោយសម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានសរសេរបង្ហោះក្នុងហ្វេសប៊ុកផ្លូវការរបស់សម្តេចថា «ខ្ញុំក៏សុំអំពាវនាវផងដែរ ចំពោះនគរបាលចរាចរណ៍សុំមានពាក្យសំដី និងអកប្បកិរិយាថ្លៃថ្នូរចំពោះប្រជាជន បើទោះជាគាត់មានការរំលោភច្បាប់ដោយអចេតនា ឬដោយចេតនាក្តី» ។
សូមបញ្ជាក់ថា ការសម្រេចដកតួនាទី និងឋានន្តរស័ក្តិ ឧត្តមសេនីយ៍មួយរូបនោះ ធ្វើឡើងបន្ទាប់មន្ដ្រីនគរបាលចរាចរណ៍ម្នាក់ឈ្មោះ សូត្រ កញ្ញា អត្តលេខ៦៧៩៦៨ បានសុំកិច្ចអន្ដរាគមន៍ពីសម្ដេចក្រឡាហោ ស ខេង ឧបនាយករដ្ឋមន្ត្រី រដ្ឋមន្ដ្រីក្រសួងមហាផ្ទៃ ព្រោះត្រូវអង្គភាពរបស់ខ្លួនដកបញ្ឈជើង បន្ទាប់ពីមន្ដ្រីនគរបាលចរាចរណ៍រូបនេះបានឃាត់រថយន្តមួយគ្រឿង ម៉ាក RAV4 ពណ៌ទឹកប្រាក់ ពាក់ស្លាកលេខ ភ្នំពេញ 2AA-9562 ដែលបានបើកមិនគោរពភ្លើងសញ្ញាចរាចរ ប៉ះចំរថយន្ដលោឧត្តមសេនីយ៍ពាក់ផ្កាយ៣ម្នាក់ ដែលត្រូវគេទម្លាយថា គឺលោក ម៉ម ស្រ៊ីវណ្ណា អគ្គនាយករង នៃអគ្គនាយកដ្ឋានអន្តោប្រវេសន៍ ក្រសួងមហាផ្ទៃ ។ នេះបើយោងតាមគណនីយហ្វេសប៊ុកមួយឈ្មោះ សុវណ្ណ រីហ្គេន បានបង្ហោះកាលពីថ្ងៃទី២៩ ខែមិថុនា ឆ្នាំ២០១៦ ៕
0 comments:
Post a Comment