នាយរងអគ្គិភ័យខេត្តព្រះវិហារម្នាក់ ស្រវឹងស្រាបើករថយន្តបុកប្រពន្ធខ្លួនឯងស្លាប់ ~ cambodiafastnews

Monday, August 10, 2015

នាយរងអគ្គិភ័យខេត្តព្រះវិហារម្នាក់ ស្រវឹងស្រាបើករថយន្តបុកប្រពន្ធខ្លួនឯងស្លាប់

ថ្ងៃចន្ទ ទី១០ ខែសីហា ឆ្នាំ២០១៥ ម៉ោង ១៦:៣៤

ខេត្តព្រះវិហារ ៖ បុរសម្នាក់ឈ្មោះឡូញ សេរីសោភ័ណ្ឌ អាយុ៤៥ឆ្នាំ ជានាយរងការិយាល័យអគ្គិភ័យ ផឹកស៊ីនៅក្នុងផ្ទះរបស់ខ្លួនមិនអស់ចិត្ត ក៏សុំប្រពន្ធចេញទៅផឹកស៊ីនៅខាងក្រៅផ្ទះទៀត ស្រាប់តែឡើងជិះរថយន្តជ្រុលចង្កូចទៅបុកប្រពន្ធខ្លួនឯងជាប់នឹងជញ្ជាំងផ្ទះស្លាប់ភ្លាមមួយរំពេច កាលពីយប់ថ្ងៃទី០៨ សីហា កន្លងមក ស្ថិតក្នុងភូមិអណ្តូងពោធិ៍ សង្កាត់កំពង់ប្រណាក ក្រុងព្រះវិហារ ។

តាមសាក្សីនៅនឹងកន្លែងកើតហេតុបានរៀបរាប់ថា មុនពេលកើតហេតុ បុរសជាប្តីបានផឹកស្រានៅក្នុងផ្ទះរបស់ខ្លួនជាមួយមិត្តភក្តិ ក្រោយមកបុរសជាប្តីខាងលើបានសុំប្រពន្ធ បើករថយន្តឡិចស៊ីស៣០០ ពណ៌ស្ករ ពាក់ស្លាកលេខ ភ្នំពេញ 2K-8222 ដើម្បីចេញទៅផឹកស៊ីនៅខាងក្រៅជាមួយមិត្តភក្តិបន្តទៀត ក្នុងស្ថានភាពស្រវឹងជោកជាំផង តែត្រូវប្រពន្ធបដិសេធដោយសារឃើញប្តីស្រវឹងខ្លាំងពេក ស្រាប់តែបុរសខាងលើមិនស្តាប់ រួចក៏បានឡើងជិះរថយន្តបម្រុងថយក្រោយ តែចៃដន្យដោយសារតែបុរសខាងលើមិនសូវប៉ិនប្រសព្វបើករថយន្តផង ស្រាប់តែបានដាក់លេខរថយន្តទៅមុខបុកប្រពន្ធតាំងពីមុខផ្ទះរហូតធ្លាយជញ្ជាំងក្រោយផ្ទះស្លាប់ភ្លាមៗមួយរំពេច ។

មន្ត្រីស្នងការដ្ឋាននគរបាលខេត្តព្រះវិហារ ស្ត្រីជនរងគ្រោះជាប្រពន្ធមានឈ្មោះជឹម វណ្ណា អាយុ៤២ឆ្នាំ មានកូនប្រុស មានទីលំនៅភូមិអណ្តូងពោធិ៍ សង្កាត់កំពង់ប្រណាក ក្រុងព្រះវិហារ ។ មកដល់ពេលនេះ ជនបង្កជាប្តី ត្រូវសមត្ថកិច្ចស្នងការដ្ឋាននគរបាលខេត្តព្រះវិហារកំពុងកសាងសំណុំរឿងចាត់ការទៅតាមនីតិវិធី ។

ប្រភព ៖ កោះសន្តិភាព